Home Local ಉದಯೋನ್ಮುಖ ಕಲಾ ಪ್ರತಿಭೆ ಕು.ವಿನಾಯಕ ಹೆಬ್ಬಾರ !

ಉದಯೋನ್ಮುಖ ಕಲಾ ಪ್ರತಿಭೆ ಕು.ವಿನಾಯಕ ಹೆಬ್ಬಾರ !

SHARE

ಕಲೆ ಯಾರಿಗೆ ಒಲಿಯುತ್ತೆ ಎಂಬುದು ಯಾರಿಗೂ ಅರಿವಿಗೆ ಇರದ ಸಂಗತಿ. ಬದುಕಿನಲ್ಲಿ ಕಲೆಯ ನೆಲೆ ಕಂಡುಕೊಂಡವರು ಹಲವರು. ಬದುಕನ್ನೇ ಕಲೆಗೆ ಅರ್ಪಿಸಿದವರು ಇನ್ನೂ ಕೆಲವರು. ಹೌದು, ಇದು ಉದಯೋನ್ಮುಖ ಕಲಾವಿದನ ಕುರಿತಾಗಿ “ಸತ್ವಾಧಾರ ನ್ಯೂಸ್” ನೀಡುತ್ತಿರುವ ವರದಿ .

ಈ ಕಲಾ ಪ್ರತಿಭೆಯೇ ಕು. ವಿನಾಯಕ ಹೆಬ್ಬಾರ, ಕುಮಟಾದ ವಿವೇಕ ನಗರ ನಿವಾಸಿ ರಾಮಚಂದ್ರ ಗಣಪತಿ ಹೆಬ್ಬಾರರ ಸುಪುತ್ರ. ಈತ ತಾಲೂಕಿನ ನೆಲ್ಲಿಕೇರಿಯ ಶಾಸಕರ ಮಾದರಿ ಶಾಲೆಯಲ್ಲಿ SSLC ಯನ್ನು ಈ ಬಾರಿ 84℅ ಅಂಕಗಳೊಂದಿಗೆ ಪೂರೈಸಿರುವ, ಬಾಲ್ಯದಿಂದಲೂ ಕಲಾಸಕ್ತ ವಿದ್ಯಾರ್ಥಿ.

ಕಲಾ ದೇವತೆ ರಂಗವಲ್ಲಿಯ ರೂಪದಲ್ಲಿ ಈತನ ಕೈವಶ ಆಗಿದ್ದಾಳೆ ಎಂಬ ಮಟ್ಟಿಗೆ ಈತನ ಪ್ರತಿಭೆ ಬೆಳೆದಿದೆ. ರಂಗೋಲಿ ಬಿಡಿಸುವುದರಲ್ಲಿನ ಈತನ ಕೈಚಳಕ ಅಪಾರ ಮೆಚ್ಚುಗೆ ಪಡೆದಿದೆ.ಕುಂಚದಿಂದ ಚಿತ್ರಗಳನ್ನು ಬಿಡಿಸುವ ಈತನ ಹವ್ಯಾಸವೂ ಅಷ್ಟೇ ಪ್ರಶಂಸೆಗೆ ಪಾತ್ರವಾಗಿದ್ದಾನೆ.

ವಿವೇಕನಗರದ ಶ್ರೀ ಲಕ್ಷ್ಮೀ ನರಸಿಂಹ ದೇವಸ್ಥಾನ ಹಾಗೂ ಮಾನೀರ ಅಮ್ಮನವರ ದೇವಾಲಯಗಳಲೆಲ್ಲಾ ವಿಶೇಷ ಉತ್ಸವ ಹಬ್ಬಹರಿದಿನಗಳಲ್ಲಿ ಈತನು ಬಿಡಿಸುವ ರಂಗೋಲಿಯನ್ನು ಕಂಡ ಪ್ರತಿಯೋರ್ವರೂ ಈ ಕಲಾಕಾರನ ಕುರಿತು ವಿಚಾರಿಸುತ್ತಿರುತ್ತಾರೆ.

ಶಾಲಾ ವಿದ್ಯಾರ್ಥಿಗಳಿಗಾಗಿ ನಡೆಸಲ್ಪಡುವ ಕಲಾ ಸ್ಪರ್ಧೆಗಳಲ್ಲಿ ಭಾಗವಹಿಸಿ ಸೈ ಎನಿಸಿಕೊಂಡಿರುವುದಷ್ಟೇ ಅಲ್ಲದೇ ರಾಜ್ಯಮಟ್ಟದವರೆಗಿನ ವಿವಿಧ ಕಲಾ ಸ್ಪರ್ಧೆಗಳಲ್ಲಿಯೂ ಭಾಗವಹಿಸಿ ಪುರಸ್ಕೃತನಾಗಿರುವುದು ಹೆಮ್ಮೆಯ ಸಂಗತಿ.

ಕು.ವಿನಾಯಕನಿಗೆ ಈ ಕಲೆಯು ಕುಟುಂಬದ ಬಳವಳಿ ಎಂದರೂ ತಪ್ಪಿಲ್ಲ.ಈತನ ತಂದೆ ರಾಮಚಂದ್ರ ಹೆಬ್ಬಾರ ರವರೂ ಕೂಡ ಭಕ್ತಿ ಸಂಗೀತ – ಕಲೆಯ ಆರಾಧಕರಾಗಿರುತ್ತಾರೆ.ಪ್ರತಿ ವರ್ಷ ಶ್ರೀ ಗಣೇಶ ಚತುರ್ಥಿಯಲ್ಲಿ ತಮ್ಮ ಮನೆಯಲ್ಲಿ ಪೂಜಿಸುವ ಮಣ್ಣಿನ ಗಣಪತಿಯನ್ನು ತಾವೇ ಸ್ವತಃ ಸುಂದರವಾಗಿ ತಯಾರಿಸುವ ರೂಢಿಯಿಟ್ಟುಕೊಂಡವರು.ಹೀಗೆ ಕುಟುಂಬದ ಹಿನ್ನೆಲೆಯೂ ಕು.ವಿನಾಯಕನ ಕಲಾಸಕ್ತಿಗೆ ಪೂರಕವಾಗಿದೆ.

ಕಳೆದ ಎಸ್.ಎಸ್.ಎಲ್.ಸಿ.ಯಲ್ಲಿ ಶೇಕಡಾ 84 ರಷ್ಟು ಅಂಕ ಗಳಿಸಿರುವ ಈತನು ಮೆಕ್ಯಾನಿಕಲ್ ಡಿಪ್ಲೋಮಾ ಕಲಿಯುವ ಆಸಕ್ತಿ ಹೊಂದಿದ್ದು ಪ್ರವೇಶ ಪಡೆಯಲು ಅರ್ಹತೆ ಹೊಂದಿರುತ್ತಾನೆ.

ಕು.ವಿನಾಯಕ ಹೆಬ್ಬಾರ ಈತನು ತನ್ನ ಶೈಕ್ಷಣಿಕ ವಿದ್ಯಾಭ್ಯಾಸದಲ್ಲಿ ಉನ್ನತ ಸಾಧನೆಗೈಯ್ಯುವುದರ ಜೊತೆಗೆ ತನ್ನ ಈ ಕಲಾರಾಧನೆಯನ್ನೂ ಮುಂದುವರೆಸುತ್ತ ಈ ರಂಗದಲ್ಲಿಯೂ ಹೆಚ್ಚಿನ ಸಾಧನೆ ಗೈಯ್ಯುವಂತಾಗಲೆಂದು ಹೆಬ್ಬಾರ ಕುಟುಂಬದ ಹಿತೈಷಿ ಜಯದೇವ ಬಳಗಂಡಿಯವರು ಆಶಿಸಿ, ಅಭಿನಂದಿಸಿ, ಶುಭಕೋರಿದ್ದಾರೆ.