ಕಾರವಾರ: ಸಮೀಪದ ಅರಬ್ಬಿ ಸಮುದ್ರದಲ್ಲಿರುವ ಕೂರ್ಮಗಡ ದ್ವೀಪದಲ್ಲಿ ಮಂಗಳವಾರ ಬಹಳ ಅದ್ದೂರಿಯಿಂದ ಕೂರ್ಮಗಡ ಜಾತ್ರೆ ನೆರವೇರಿತು.
ಕೂರ್ಮಗಡ ದ್ವೀಪದಲ್ಲಿರುವ ನರಸಿಂಹ ದೇವರ ಮೂರ್ತಿಗೆ ಭಕ್ತರಿಂದ ವಿಶೇಷ ಪೂಜೆ ಪುನಸ್ಕಾರಗಳನ್ನು ಸಲ್ಲಿಸಲಾಯಿತು. ಜಾತ್ರೆಯಲ್ಲಿ ದೇವರಿಗಾಗಿ ಕಾಣಿಕೆಗಳನ್ನು ಸಲ್ಲಿಲಾಯಿತು.
ಬೆಳಿಗ್ಗೆ ಕೋಡಿಬಾಗದಿಂದ ನರಸಿಂಹ ದೇವರನ್ನು ಪಲ್ಲಕಿಯಲ್ಲಿ ಕೂರಿಸಿ ದ್ವೀಪಕ್ಕೆ ತರಲಾಯಿತು. ನಂತರ ವೈದಿಕರ ಸಮ್ಮುಖದಲ್ಲಿ ದೇವಸ್ಥಾನದಲ್ಲಿ ಪ್ರತಿಷ್ಟಾಪನೆಯಾದ ಬಳಿಕ ವಿಶೇಷ ಪೂಜೆ ಸಲ್ಲಿಸಲಾಯಿತು.
ಭಕ್ತರು ಹರಕೆ ಹೊತ್ತು ತಂದ ಬಾಳೆಗೊನೆಗಳನ್ನು ಹರಾಜಿನ ಮೂಲಕ ನೀಡಲಾಗಿದ್ದು ಭಕ್ತಾಧಿಗಳಿಗೆ ನೀಡಲಾಗಿದ್ದು, ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿ ಹರಾಜಿನ ಪ್ರಕ್ರಿಯೆಯಲ್ಲಿ ಭಾಗವಹಿಸಿದರು.
ಜಾತ್ರೆಯಲ್ಲಿ ಸಾವಿರಾರು ಭಕ್ತಾಧಿಗಳು ಭಾಗವಹಿಸಿದರು. ಹಾಗೂ ತಾಲೂಕಿನ ಕೋಡಿಬಾಗ, ಬೈತ್‌ಖೋಲ್, ಮಾಜಾಳಿ, ಮುದಗಾ ಹಾಗೂ ಇನ್ನಿತರ ಸ್ಥಳಗಳಿಂದ ದ್ವೀಪದವರೆಗೆ ವಿಶೇಷ ದೋಣಿಯ ವ್ಯವಸ್ಥೆ ಮಾಡಲಾಯಿತು. ಜಾತ್ರಾ ಮಹೋತ್ಸವದಲ್ಲಿ ಭಕ್ತಾದಿಗಳಿಂದ ಪೂಜೆ, ಅಭಿಷೇಕ, ಬಾಳೆಗೊನೆ ಹರಕೆ ಮುಂತಾದ ಪೂಜಾ ವಿಧಿ ವಿಧಾನಗಳನ್ನು ನೆರವೇರಿಸಲಾಯಿತು. ನಂತರ ದೇವರಿಗೆ ಸಮರ್ಪಿಸಿದ ಪಂಚಕಜ್ಜಾಯ ಪ್ರಸಾದವನ್ನು ಸಾಲಿನಲ್ಲಿ ನಿಂತಿದ್ದ ಭಕ್ತರಿಗೆ ವಿತರಣೆ ಮಾಡಲಾಯಿತು. ಮದ್ಯಾಹ್ನದವರೆಗೂ ಸಹ ಭಕ್ತರು ದ್ವೀಪದೆಡೆಗೆ ಆಗಮಿಸುತ್ತಿದ್ದರು. ಜಾತ್ರೆಯಲ್ಲಿ ಅಂಗಡಿ ಮುಂಗಟ್ಟುಗಳು ಹೆಚ್ಚಾಗಿ ಕಂಡು ಬಂದವು. ಆದರೆ, ಎಲ್ಲಾ ತಿಂಡಿ ತಿನಿಸುಗಳ ದರ ದ್ವಿಗುಣದಲ್ಲಿದ್ದವು. ಸಿಹಿ ತಿಂಡಿಗಳು, ತಂಪು ಪಾನೀಯ, ಐಸ್‌ಕ್ರೀಮ್‌ಗಳು ಹೆಚ್ಚಾಗಿ ಮಾರು ಹೋದವು.
ದ್ವೀಪಕ್ಕೆ ತಲುಪಲು ಸುಮಾರು ಅರ್ಧ ಗಂಟೆ ದೋಣಿಯಲ್ಲಿ ಪ್ರಯಾಣಿಸಬೇಕಾದ್ದರಿಂದ ಭಕ್ತಾಧಿಗಳಿಗೆ ಈ ದೋಣಿ ವಿಹಾರ ವಿಶೇಷ ಅನುಭವ ನೀಡಿತು. ಜಾತ್ರೆಗೆ ಮಕ್ಕಳು, ಹಿರಿಯರು ಸೇರಿದಂತೆ ಹೆಚ್ಚಿನ ಸಂಖ್ಯೆಯಲ್ಲಿ ಯುವಕರು ಭಾಗವಹಿಸಿದ್ದರು. ಸಮಸ್ತ ಭಕ್ತಾಧಿಗಳಿಗೂ ದೋಣಿ ವಿಹಾರ ಮನಸ್ಸಿಗೆ ಮುದ ನೀಡಿತು. ಭಕ್ತಾಧಿಗಳಿಗೆ ಪ್ರವಾಸದ ಅನುಭವ: ಸಮುದ್ರದ ಮಧ್ಯಭಾಗಕ್ಕೆ ದೋಣಿಯಲ್ಲಿ ಪ್ರಯಾಣಿಸಬೇಕಾದ್ದರಿಂದ ಭಕ್ತಾಧಿಗಳಿಗೆ ಪ್ರವಾಸದ ಅನುಭವವಾಯಿತು. ಬಹುತೇಕ ಜನರು ಊಟ ತಿಂಡಿಗಳನ್ನು ಮನೆಯಿಂದಲೇ ತಯಾರಿಸಿ ಜಾತ್ರೆಗೆ ತಂದರು. ಅನೇಕರು ಸ್ಥಳದಲ್ಲೇ ಹಾಸಿಗೆ ಹಾಯಿಸಿ ವಿಶ್ರಾಂತಿ ತೆಗೆದುಕೊಳ್ಳುತ್ತಿರುವುದು ಕಂಡು ಬಂತು. ದ್ವೀಪದ ಗುಡ್ಡದ ಮೇಲಿಂದ ಸಮುದ್ರವನ್ನು ವೀಕ್ಷಿಸಿದರೆ ಸುಂದರ ನೋಟವನ್ನು ಕಾಣಬಹುದು. ಹಾಗಾಗಿ ಎಲ್ಲಾ ಭಕ್ತರು ತಮ್ಮ ಸ್ನೇಹಿತರು ಹಾಗೂ ಕುಟುಂಬದವರೊಂದಿಗೆ ಫೋಟೊ ಕ್ಲಿಕ್ಕಿಸುತ್ತಾ ಆನಂದಿಸಿದರು. ಸಂಜೆಯವರೆಗೆ ಭಕ್ತಾಧಿಗಳ ಸಂಖ್ಯೆ ಕಡಿಮೆಯಾಗದೆ ಬಹು ಆಸಕ್ತಿಯಿಂದ ಕೂರ್ಮಗಡ ಜಾತ್ರೆಯಲ್ಲಿ ಪಾಲ್ಗೊಂಡರು.
