ಸಿದ್ದಾಪುರ: ಛಾಯಾಚಿತ್ರ ಕಲೆಯ ಜಾಗತಿಕ ಒಕ್ಕೂಟ (ಇಂಟರ್ನ್ಯಾಶನಲ್ ಫೆಡರೇಶನ್ ಆಫ್ ಫೋಟೋಗ್ರಾಫಿಕ್ ಆರ್ಟ್) ಸಂಸ್ಥೆಯ ಎಕ್ಸಲೆನ್ಸ್ ಗೌರವ ಪ್ರಶಸ್ತಿ ತಾಲೂಕಿನ ನಾಗೇಂದ್ರ ಮುತ್ಮುರ್ಡ ಅವರಿಗೆ ಲಭಿಸಿದೆ.
ಕಲಾತ್ಮಕ ಛಾಯಾಚಿತ್ರಗ್ರಹಣದಲ್ಲಿ ಕೊಡುಗೆಗಳನ್ನು ಪರಿಗಣಿಸಿ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ನೀಡುವ ಗೌರವ ಇದಾಗಿದ್ದು, ನಾಗೇಂದ್ರ ಮುತ್ಮುರ್ಡ ಅವರಿಗೆ ಭಾವಾಭಿವ್ಯಂಜಕ ಚಿತ್ರಗಳು(ಪಿಕ್ಟೋರಿಯಲ್) ವಿಭಾಗದಲ್ಲಿ ಈ ಪ್ರಶಸ್ತಿ ಕೊಡಲಾಗುತ್ತಿದೆ.
ಯುರೋಪಿನ ಲಕ್ಸಂಬರ್ಗ್ನಲ್ಲಿ ಪ್ರಧಾನ ಕಚೇರಿ ಹೊಂದಿರುವ ಸಂಸ್ಥೆ ವಿಶ್ವದ 90 ದೇಶಗಳ ಛಾಯಾಚಿತ್ರ ಸಂಘಟನೆಗಳ ಸದಸ್ಯತ್ವ ಹೊಂದಿದೆ. ನಾಗೇಂದ್ರ ಮುತ್ಮುರ್ಡ ಅವರ ಛಾಯಾ ಚಿತ್ರಗಳು ಫ್ರಾನ್ಸ್ ,ಅಮೆರಿಕ, ಜರ್ಮನಿ ಸೇರಿ ವಿಶ್ವದ 25 ರಾಷ್ಟ್ರಗಳಲ್ಲಿ ಪ್ರದರ್ಶನ ಕಂಡು ಮೆಚ್ಚುಗೆಗೆ ಪಾತ್ರವಾಗಿವೆ.
