ಬಾಗಲಕೋಟೆ: ಗಂಡ ಸರಿಯಾಗಿ ಮನೆ ನಡೆಸುವುದಿಲ್ಲ ಎಂದು ಜಗಳವಾಡಿ ದೂರು ನೀಡಲು ಬಂದಿದ್ದ ಪತ್ನಿಗೆ ಆಕೆಯ ಗಂಡ ಥಳಿಸಿದ ಘಟನೆ ಬಾದಾಮಿ ಪೊಲೀಸ್ ಠಾಣೆಯಲ್ಲಿ ನಡೆದಿದೆ.
ಬಾದಾಮಿ ತಾಲೂಕಿನ ಶಿರಬಡಿಗಿ ಗ್ರಾಮದ ಗಂಡ-ಹೆಂಡತಿ ಇಬ್ಬರೂ ಕೌಟುಂಬಿಕ ಕಲಹದ ಹಿನ್ನೆಲೆಯಲ್ಲಿ ಜಗಳವಾಡಿಕೊಂಡು ಠಾಣೆಗೆ ಬಂದಿದ್ದರು. ಠಾಣೆಯಲ್ಲಿ ಗಂಡ ತನ್ನ ಹೆಂಡತಿಗೆ ಥಳಿಸಿದ್ದಾನೆ. ಈ ಸಂದರ್ಭದಲ್ಲಿ ಅಲ್ಲೇ ಇದ್ದ ಗಂಡ ಹೆಂಡತಿಯರಿಬ್ಬರ ಕಡೆಯ ಪೋಷಕರ ನಡುವೆ ಮಾತಿಗೆ ಮಾತು ಬೆಳೆದು ಕೈ-ಕೈ ಮಿಲಾಯಿಸಿದ್ದಾರೆ.
ಬಾದಾಮಿ ಪೊಲೀಸ್ ಠಾಣೆಯ ಎದುರೇ ಎರಡು ಗುಂಪಿನ ಕಡೆಯವರು ಮೈಮೇಲಿನ ಶರ್ಟ್ ಹರಿಯುವ ಹಾಗೆ ಪರಸ್ಪರ ಬಡಿದಾಡಿಕೊಂಡರು. ಹೊಡೆದಾಟಕ್ಕಿಳಿದಿದ್ದ ಎರಡು ಕಡೆಯ ಗುಂಪಿನವರನ್ನು ಚದುರಿಸಲು ಪೊಲೀಸರು ಹರಸಾಹಸ ಪಟ್ಟರು. ನಂತರ ಪೊಲೀಸರು ಎರಡು ಕಡೆಯ ಗುಂಪಿನವರನ್ನ ಎಳೆದು ಠಾಣೆಯ ಒಳಗೆ ಕರೆದೊಯ್ದು ಸಮಾಧಾನ ಪಡಿಸಿದರು.
