ಕುಮಟಾ : ಶಿಕ್ಷಣ ಲೋಕದಲ್ಲಿ ತಮ್ಮದೇ ಛಾಪು ಮೂಡಿಸಿ, ಹೆಸರು ಮಾಡಿದ್ದ ಗಿಬ್ ಹೈಸ್ಕೂಲ್ನ ಹಿರಿಯ ಶಿಕ್ಷಕ ಆರ್.ವಿ. ಗಾವಡಿ ಮಾಸ್ತರರು (87) ಶನಿವಾರ ಬೆಳಿಗ್ಗೆ ಇಹಲೋಕ ತ್ಯಜಿಸಿದ್ದಾರೆ. ವಯೋಸಹಜ ಅನಾರೋಗ್ಯದಿಂದ ಮಣಿಪಾಲದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಅವರು ನಿಧನರಾದರು.
ಬಹು ಪೀಳಿಗೆಗಳ ವಿದ್ಯಾರ್ಥಿ–ವಿದ್ಯಾರ್ಥಿನಿಗಳಿಗೆ ವಿಷಯದ ಗಾಢ ಪಾಂಡಿತ್ಯ, ಸರಳತೆ, ವಿನಯ, ಮತ್ತು ಮಮತಾಗಳಿಂದ ಸ್ಫೂರ್ತಿಯಾಗಿದ್ದ ಗಾವಡಿ ಮಾಸ್ತರರು, “ಶಿಕ್ಷಣವೆಂದರೆ ಕೇವಲ ಪಾಠವಲ್ಲ – ವ್ಯಕ್ತಿತ್ವ ರೂಪಿಸುವ ಕಾರ್ಯ” ಎಂಬ ನಂಬಿಕೆಯಿಂದ ಬದುಕಿದ್ದರು.
ಶಾಲೆಯ ಅನುಭವ, ಜೀವನ ಮೌಲ್ಯಗಳು ಮತ್ತು ಮಾನವೀಯತೆಯನ್ನು ಪಾಠಗಳೊಂದಿಗೆ ಬೆರೆಸಿ ಬೋಧಿಸುವ ಸಾಮರ್ಥ್ಯ ಅವರಿಗೆ ಅನನ್ಯ ಗೌರವ ತಂದುಕೊಟ್ಟಿತ್ತು. ಅವರ ವಿಧಾನದ ಬಲವೇ, ಇಂದಿಗೂ ವಿದ್ಯಾರ್ಥಿಗಳು ಅವರನ್ನು “ಮಾಸ್ತರರಲ್ಲ — ಮಹಾಗುರು” ಎಂಬ ಗೌರವದಿಂದ ನೆನಪಿಸಿಕೊಳ್ಳುವಂತೆ ಮಾಡಿದೆ.
“ಗಾವಡಿ ಮಾಸ್ತರರ ಅಗಲಿಕೆ ನಮ್ಮ ಜೀವನದಲ್ಲಿ ಖಾಲಿತನ ಮೂಡಿಸಿದೆ. ಅವರು ನೀಡಿದ ಪಾಠಗಳು ನಮ್ಮ ಬದುಕಿನ ದಾರಿ ಬೆಳಗುತ್ತವೆ” ಎಂದು ಕೆನರಾ ಶಿಕ್ಷಣ ಸಂಸ್ಥೆಯವರು ತಮ್ಮ ಸಂತಾಪ ಸಂದೇಶದಲ್ಲಿ ಹೇಳಿದ್ದಾರೆ. ಮೃತರು ಪತ್ನಿ, ಒಬ್ಬ ಪುತ್ರ, ಇಬ್ಬರು ಪುತ್ರಿಯರು ಹಾಗೂ ಅನೇಕ ವಿದ್ಯಾರ್ಥಿಗಳನ್ನು ಅಗಲಿದ್ದಾರೆ.
ಚಿತ್ರಗಿ ಮಹಾತ್ಮ ಗಾಂಧಿ ಪ್ರೌಢಶಾಲೆಯ ಶಿಕ್ಷಕ ವೃಂದ, ಕವಿ ಬೀರಣ್ಣ ನಾಯಕ ಸೇರಿದಂತೆ ಸಾಮಾಜಿಕ ವಲಯದ ಅನೇಕರು ಅವರ ಅಗಲಿಕೆಗೆ ಆಳವಾದ ಶೋಕ ವ್ಯಕ್ತಪಡಿಸಿದ್ದಾರೆ. ಶಿಕ್ಷಣ ಲೋಕ ಒಬ್ಬ ಮೌಲ್ಯಗಳ ದೀಪವನ್ನು ಕಳೆದುಕೊಂಡಿದೆ.