ಖ್ಯಾತ ಹಿಂದುಸ್ತಾನಿ ಸಂಗೀತ ಗಾಯಕರು, ಸಂಗೀತ ಗುರುಗಳೂ ಆಗಿದ್ದ “ಡಾ. ಅಶೋಕ್ ಹುಗ್ಗಣ್ಣ” ಅವರು ತಮ್ಮ ಸಂಗೀತ ಸೇವೆ ನಿಲ್ಲಿಸಿ ಇಂದು ನಸುಕಿನಲ್ಲಿ ಇಹಲೋಕ ತ್ಯಜಿಸಿದ್ದಾರೆ. ತಮ್ಮ 64 ನೇ ವಯಸ್ಸಿನಲ್ಲಿ ಪತ್ನಿ, ಪುತ್ರ ಮತ್ತು ಅಪಾರ ಕಲಾಭಿಮಾನಿಗಳನ್ನು ಅಗಲಿದ್ದಾರೆ.
ಅಶೋಕ ಹುಗ್ಗಣ್ಣ ಅವರು ಹೊನ್ನಾವರ ಎಸ್.ಡಿ.ಎಂ. ಕಾಲೇಜಿನಲ್ಲಿ ಸಂಗೀತ ಪ್ರಾಧ್ಯಾಪಕರಾಗಿ ಬಹುಕಾಲ ಕೆಲಸ ಮಾಡಿದ್ದು, ಜಿಲ್ಲೆಯಲ್ಲಿ ಹಿಂದೂಸ್ಥಾನಿ ಶಾಸ್ತ್ರೀಯ ಸಂಗೀತದ ಬೆಳವಣಿಗೆಗೆ ತಮ್ಮ ಕೊಡುಗೆ ನೀಡಿದ್ದರು. ಹಲವಾರು ಪ್ರಸಿದ್ಧ ಶಿಷ್ಯರನ್ನು ತರಬೇತಿಗೊಳಿಸಿದ್ದರು. ಸಂಗೀತದಲ್ಲಿ ಎಂ.ಎ, ಸಂಗೀತ ರತ್ನ ಮತ್ತು ಸಸ್ಯ ಶಾಸ್ತ್ರದಲ್ಲಿ ಎಂಎಸ್ಸಿ ಪದವಿದರರಾದ ಹುಗ್ಗಣ್ಣ ಅವರು ಪ್ರಸಿದ್ಧ ಹಿಂದೂಸ್ಥಾನಿ ಗಾಯಕ ಕುಟುಂಬದವರಾದ ಯರಗುಪ್ಪಿ ಕುಟುಂಬದಿಂದ ಬಂದವರು.
ರಾಜಗುರು ಅವರ ಶಿಷ್ಯರಾಗಿ ಸಂಗಮೇಶ ಗುರವ ಬಳಿ ಅಧ್ಯಯನ ಮಾಡಿದ ಹುಗ್ಗಣ್ಣವರು ಪಿಎಚ್ಡಿ ಪದವಿದರರು. ಆಕಾಶವಾಣಿ, ದೂರದರ್ಶನ ಕಲಾವಿದರು. ದೇಶದ ಪ್ರತಿಷ್ಠ ವೇದಿಕೆಯಲ್ಲಿ ಹಾಡಿದವರಾಗಿದ್ದಾರೆ. ಸಂಗೀತ ನಾಟಕ ಅಕಾಡೆಮಿಯ ಸದಸ್ಯರಾಗಿ ಹಂಪಿ ವಿವಿ ಸಂಗೀತ ವಿದ್ಯಾರ್ಥಿಗಳಿಗೆ ಸಂಗೀತ ಮಾರ್ಗದರ್ಶಕರಾಗಿ ಕೆಲಸ ಮಾಡಿದ ಇವರು ನಿವೃತ್ತಿಯ ನಂತರ ಧಾರವಾಡದಲ್ಲಿ ನೆಲೆಸಿದ್ದರು.