ಯಲ್ಲಾಪುರ: ಗೋವನ್ನು ಕಾಮಧೇನು ಅಂತಾರೇ..ಬೇಡಿದ್ದನ್ನೆಲ್ಲವನ್ನೂ ನೀಡುತ್ತಾಳೆ ಗೋ ಮಾತೆ ಎಂಬುದೊಂದು ಮಾತಿದೆ. ಈ ಮಾತು ಇದೀಗ ಸತ್ಯವಾಗಿದೆ ಯಲ್ಲಾಪುರ ತಾಲೂಕಿನ ಗುಳ್ಳಾಪುರ ಸಮೀಪದ ಕಲ್ಲೇಶ್ವರದಲ್ಲಿ ರೈತರೊಬ್ಬರು ಸಾಕಿರುವ ಹಸುವೊಂದು ಗರ್ಭ ಧರಿಸದೇ ಹಾಲು ನೀಡುವ ಮೂಲಕ ಎಲ್ಲರೂ ಅಚ್ಚರಿ ಪಡುವಂತೆ ಮಾಡಿದೆ.
ಈ ಹಸು ಜನಿಸಿದ ಒಂಭತ್ತು ತಿಂಗಳಿಗೇ ಗರ್ಭ ಧರಿಸದೇ ಇದ್ದರೂ ಹಾಲು ನೀಡುತ್ತಿತ್ತು ಎನ್ನಲಾಗಿದೆ. ಇದೀಗ ಹಸುವಿಗೆ ಎರಡು ವರ್ಷ ತುಂಬಿದ್ದು, ಕಳೆದ ಒಂದೂವರೆ ವರ್ಷದಿಂದ ದಿನಕ್ಕೆ ಒಂದೂವರೆ ಲೀಟರ್‌ ಹಾಲು ನೀಡುತ್ತಿರುವುದೇ ಈ ಹಸುವಿನ ವಿಶೇಷ.
ಈ ಕರುವಿಗೆ ಒಂಭತ್ತು ತಿಂಗಳಾಗಿದ್ದಾಗಲೇ ಅಚಾನಕ್ ಆಗಿ ಕರುವಿನೊಂದಿಗೆ ಆಟವಾಡುತ್ತಾ ಮಗುವೊಂದು ಕೆಚ್ಚಲಿಗೆ ಕೈಹಾಕಿ ಎಳೆದಾಗ ಹಾಲು ಬರತೊಡಗಿರುವುದು ಪತ್ತೆಯಾಗಿದೆಯಂತೆ. ಅಂದಿನಿಂದ ನಿತ್ಯ ಎರಡು ಅವಧಿಗೆ ಹಸುವಿನ ಹಾಲು ಹಿಂಡಲಾರಂಭಿಸಿದರು.
ಹಾಲು ಹಿಂಡಲಾರಂಭಿಸಿ ಸುಮಾರು 15 ತಿಂಗಳಾದರೂ ಹಾಲು ಕೊಡುತ್ತಲೇ ಇದೆ.
ಈ ಮೊದಲು ಹಸು ಮೂರು ಲೀ. ಹಾಲು ನೀಡುತ್ತಿತ್ತು. ಈ ಅಚ್ಚರಿಯ ಸನ್ನಿವೇಶಗಳು ವಿಜ್ಞಾನಕ್ಕೊಂದು ಸವಾಲು ಎಂದೇ ಹೇಳಲಾಗುತ್ತಿದೆ.
