ಈಕೆಯದು ನಿಜಕ್ಕೂ ಬೆರಗುಗೊಳಿಸುವ ವ್ಯಕ್ತಿತ್ವ. ಒಬ್ಬ ವಿದ್ಯಾರ್ಥಿನಿ ಶಿಕ್ಷಣವನ್ನರಸಿ ಮತ್ತೆಲ್ಲೋ ಹೊರಟುಹೋಗದೆ ತನ್ನ ಹಳ್ಳಿಯಲ್ಲಿಯೇ ಕಲಿತು ಒಬ್ಬ ಉತ್ತಮ ನೃತ್ಯಪಟುವಾಗಿ, ಗಾಯಕಿಯಾಗಿ, ಭಾಷಣಕಾರಳಾಗಿ, ಬಹುಮುಖ ಪ್ರತಿಭಾನ್ವಿತೆಯಾಗಿ ಈಗ ಪಿ.ಯು.ಸಿ ವಾಣಿಜ್ಯ ವಿಭಾಗದಲ್ಲಿ ಉತ್ತರ ಕನ್ನಡ ಜಿಲ್ಲೆಗೆ ಟಾಪರ್ ಆಗಿ ಹೊರಹಮ್ಮಿದ ಹುಡುಗಿ ಅಂಕಿತಾ ಈಗ ಉನ್ನತ ಶ್ರೇಯಾಂಕಿತೆ.
ಹೊನ್ನಾವರ ತಾಲ್ಲೂಕಿನ ಹೊಸಾಕುಳಿ ಗ್ರಾಮದ ಕೊಡ್ಲಮಕ್ಕಿ ನಿವಾಸಿಯಾದ ಶ್ರೀಯುತ ಶ್ರೀಧರ ಭಟ್ಟ ಹಾಗೂ ವೀಣಾ ದಂಪತಿಗಳ ಸುಪುತ್ರಿ ಅಂಕಿತಾ ಕಳೆದ ಮಾರ್ಚನಲ್ಲಿ ಜರುಗಿದ ಪಿ.ಯು.ಸಿ. ಪರೀಕ್ಷೆಯಲ್ಲಿ ವಾಣಿಜ್ಯ ವಿಭಾಗದಲ್ಲಿ 588/600 ಅಂಕಗಳನ್ನು ಪಡೆದು ಹೊನ್ನಾವರ ಎಸ್.ಡಿ.ಎಂ.ಕಾಲೇಜಿಗೂ, ನಮ್ಮ ಊರಿಗೂ ಕೀರ್ತಿ ತಂದಿದ್ದಾಳೆ. ಮಧ್ಯಮ ವರ್ಗದ ಕೃಷಿಕ ಕುಟುಂಬದಲ್ಲಿ ಜನಿಸಿದ ಅಂಕಿತಾಳದು ಬಾಲ್ಯದಿಂದಲೂ ಚುರುಕು ವ್ಯಕ್ತಿತ್ವ.
ಆಕರ್ಷಕವಾಗಿ ನರ್ತಿಸಬಲ್ಲ ಈಕೆಯು ಯಾವ ಡಾನ್ಸ ಶೋ ಗೆ ಹೋದರೂ ಚಾಂಪಿಯನ್ ಆಗಬಲ್ಲಷ್ಟು ಪ್ರತಿಭಾನ್ವಿತೆ. ಆದರೆ ತನ್ನ ಮನೆಯಾಯ್ತು ತನ್ನ ಓದಾಯ್ತು ಎನ್ನುವ ಅಂಕಿತಾಳ ಪರಿಶ್ರಮ ಕ್ಕೆ ಅವಳು ಪಡೆದ ಈ ಅಂಕಗಳೇ ಸಾಕ್ಷಿ. ಎರಡು ವಿಷಯದಲ್ಲಿ 100/100 ಸಾಧನೆ ಮಾಡಿದ ಅಂಕಿತಾ ಬಡತನವನ್ನೂ ಮೆಟ್ಟಿ ನಿಂತ ಛಲಗಾತಿ. ಎಲ್ಲೋ ಹೋದರೆ ಏನೋ ಆದೀತೆಂಬ ವಾಸ್ತವಕ್ಕೆ ಉತ್ತರವಾಗಿ ನಿಲ್ಲುವ ಅಂಕಿತಾ ಹಳ್ಳಿಯಲ್ಲಿದ್ದುಕೊಂಡೇ ಎಲ್ಲರೂ ಮೆಚ್ಚುವ ಸಾಧನೆ ಮಾಡಿದ್ದಾಳೆ. ಈ ಅಪ್ಪಟ ಗ್ರಾಮೀಣ ಪ್ರತಿಭೆಗೆ ನಮ್ಮದೊಂದು ಸಲಾಂ. ಅಂಕಿತಾಳ ಭವಿಷ್ಯ ಉಜ್ವಲವಾಗಿರಲಿ ಎಂದು ನಾವೆಲ್ಲಾ ಹಾರೈಸೋಣ. ಸಾಧ್ಯವಾದರೆ ಬೆಂಬಲವಾಗೋಣ.
