ಕುಮಟಾ: ನಿವೃತ್ತ ಪ್ರೌಢಶಾಲಾ ಶಿಕ್ಷಕ ಮತ್ತು ಪ್ರಭಾರ ಮುಖ್ಯ ಶಿಕ್ಷಕ ಎಸ್.ಎಮ್.ಭಟ್ಟ ಹಾಗೂ ನಿವೃತ್ತ ಬಿ.ಎಸ್.ಎನ್.ಎಲ್.ಅಧಿಕಾರಿ ಸುಶೀಲಾ ಭಟ್ಟ ದಂಪತಿಗಳು ಅಮೇರಿಕಾ ಪ್ರವಾಸ ಮಾಡಿ, ‘ಅಂದದ ಅಮೇರಿಕಾ’ ಎಂಬ ಪ್ರವಾಸ ಕಥನವನ್ನು ರಚಿಸಿ ಅದನ್ನು ಚಿತ್ರಿಗಿ ಮಹಾತ್ಮಾ ಗಾಂಧಿ ಪ್ರೌಢಶಾಲೆಯ ಗ್ರಂಥಾಲಯಕ್ಕೆ ನೀಡುವ ಮೂಲಕ ಅನಾವರಣಗೊಳಿಸಿದರು.
ಪ್ರವಾಸ ಕಥನವನ್ನು ಸ್ವೀಕರಿಸಿ ಮಾತನಾಡಿದ ಮುಖ್ಯಾಧ್ಯಾಪಕ ಎನ್.ಆರ್.ಗಜು, ಅಮೇರಿಕೆಯ ಸುಂದರ ಸ್ವಪ್ನದಲ್ಲಿರುವ ಇಂದಿನ ಯುವ ಪೀಳಿಗೆಗೆ ಮಾರ್ಗದರ್ಶಕ ಹಾಗೂ ಅಧ್ಯಯನಯೋಗ್ಯವಾದ 59 ಕಿರು ಅಧ್ಯಾಯಗಳಲ್ಲಿ ನಿರೂಪಿತವಾದ ಸ್ವಾನುಭವಗಳ ಸಂಗಮವಾಗಿರುವ ಬಣ್ಣದ ಫೋಟೋ ಆಲ್ಬಮ್ ಓದುಗರಿಗೆ ಆಹ್ಲಾದಕರವಾಗಿ ಕನಸುಗಣ್ಣುಗಳ ಮನಸೂರೆಗೊಂಡು ಭಾವೀ ಪ್ರವಾಸಕ್ಕೆ ಉಪಯುಕ್ತವಾಗಬಲ್ಲದೆಂದು ಅಭಿಪ್ರಾಯಪಟ್ಟರು. ಈ ಸಂದರ್ಭದಲ್ಲಿ ಹಿರಿಯ ಶಿಕ್ಷಕರಾದ ವಿಷ್ಣು ಭಟ್ಟ ಮತ್ತು ಅನಿಲ್ ರೊಡ್ರಿಗಸ್ ಇದ್ದರು.
