ಹೊನ್ನಾವರ: ಸಿಬಿಎಸ್ಇ 10ನೇ ತರಗತಿ ಪರೀಕ್ಷೆಯಲ್ಲಿ ಧಾರವಾಡದ ಜೆಎಸ್ಎಸ್ ಸಂಸ್ಥೆಯ ವಿದ್ಯಾರ್ಥಿನಿ ಗಿರಿಜಾ ಮಂಜುನಾಥ ಹೆಗಡೆ ರಾಜ್ಯಕ್ಕೆ ದ್ವಿತೀಯ ರ್ಯಾಂಕ್ ಪಡೆದಿದ್ದಾಳೆ. 500 ಅಂಕಗಳಿಗೆ 497 ಅಂಕ ಗಳಿಸಿ ಶೇ.99.4 ಸಾಧನೆಗೈದಿದ್ದಾರೆ. ಆದರೆ ಈ ಹುಡುಗಿ ಉತ್ತರ ಕನ್ನಡದ ಪ್ರತಿಭೆ ಎಂಬುದು ವಿಶೇಷ.
ಎಸ್ಡಿಎಂ ಸಂಸ್ಥೆಯ ಮೆಡಿಕಲ್ ಕಾಲೇಜಿನಲ್ಲಿ ಹಾರ್ಟಿಕಲ್ಚರಿಸ್ಟ್ ಆಗಿರುವ ಮಂಜುನಾಥ ಹೆಗಡೆ ಹಾಗೂ ತುಂಗಾ ದಂಪತಿ ಹಿರಿಯ ಪುತ್ರಿ ಗಿರಿಜಾ. ದ್ವಿತೀಯ ರ್ಯಾಂಕ್ ಮೂಲಕ ತನ್ನ ಕುಟುಂಬ ಹಾಗೂ ಜೆಎಸ್ಎಸ್ ಸಂಸ್ಥೆಯ ಕೀರ್ತಿ ಹೆಚ್ಚಿಸಿದ್ದಾರೆ. ಗಿರಿಜಾ ಪಾಲಕರು ಮೂಲತಃ ಉತ್ತರ ಕನ್ನಡ ಜಿಲ್ಲೆಯ ಹೊನ್ನಾವರ ತಾಲೂಕಿನ ಮುಗ್ವಾ ಸುಬ್ರಮಣ್ಯ ಗ್ರಾಮದವರು.
ಎಲ್ಕೆಜಿಯಿಂದ 10ನೇ ತರಗತಿವರೆಗೆ ಜೆಎಸ್ಎಸ್ ಸಂಸ್ಥೆಯ ಶ್ರೀ ಮಂಜುನಾಥೇಶ್ವರ ಸೆಂಟ್ರಲ್ ಸ್ಕೂಲ್ನಲ್ಲಿ ಓದಿದ್ದಾರೆ. ಇಂಗ್ಲಿಷ್-98, ಸಂಸ್ಕೃತ-99, ಗಣಿತ-100, ವಿಜ್ಞಾನ-100, ಸಮಾಜ ವಿಜ್ಞಾನ-100 ಅಂಕ ಗಳಿಸಿದ್ದಾರೆ. ‘ಪರೀಕ್ಷೆಗೆ ವಿಶೇಷ ತಯಾರಿ ಮಾಡಿದ್ದೆ. ಶಾಲೆಯಲ್ಲಿ ಕಲಿಸಿದ್ದಷ್ಟೇ ಅಲ್ಲದೆ ಆವಂತಿ ಕೋಚಿಂಗ್ ಕ್ಲಾಸ್ಗೆ ಹೋಗುತ್ತಿದ್ದೆ. ಹಿಂದಿನ ಪರೀಕ್ಷೆಗಳ ಪ್ರಶ್ನೆಪತ್ರಿಕೆಗಳನ್ನು ನಿರಂತರವಾಗಿ ಬಿಡಿಸುತ್ತಿದ್ದೆ. ಇದರಿಂದ ಪರೀಕ್ಷೆಗೆ ಯಾವ ರೀತಿಯ ಪ್ರಶ್ನೆಗಳು ಬರಬಹುದು ಎಂಬುದು ಗೊತ್ತಾಗುತ್ತಿತ್ತು. ಯಾವುದೇ ವಿಷಯದಲ್ಲಿ ಸಂದೇಹಗಳು ಎದುರಾದರೆ ಆಯಾ ವಿಷಯಗಳ ಶಿಕ್ಷಕರಿಂದ ಪರಿಹರಿಸಿಕೊಳ್ಳುತ್ತಿದ್ದೆ. ಮುಂದೆ ಏರ್ಪೋರ್ಸ್ ಅಧಿಕಾರಿಯಾಗುವ ಗುರಿ ಇಟ್ಟುಕೊಂಡಿದ್ದೇನೆ’ ಎಂದು ಗಿರಿಜಾ ಹೆಗಡೆ ಹೇಳುತ್ತಾಳೆ.
ಇದಿಷ್ಟೇ ಅಲ್ಲ ಇತ್ತೀಚೆಗೆ ನಡೆದ ಪ್ರತಿಭಾನ್ವೇಷಣೆಯಲ್ಲಿ ಗಿರಿಜಾ ಹೆಗಡೆ ಉತ್ತಮ ಸಾಧನೆ ತೋರಿದ್ದರು. ಈ ಮೂಲಕ ಚಂದ್ರಯಾನ-2 ಉಡಾವಣೆ ವೀಕ್ಷಣೆಗೆ ಆಯ್ಕೆಯಾಗಿರುವುದು ಮತ್ತೊಂದು ಹೆಮ್ಮೆಯ ಸಂಗತಿ.
