ಕುಮಟಾ: ಇಲ್ಲಿಯ ಎಪಿಎಂಸಿಯ ನೂತನ ಸಭಾಭವನದಲ್ಲಿ ಕಲಾಗಂಗೋತ್ರಿ ವೇದಿಕೆ ಏರ್ಪಡಿಸಿದ ಎಸ್ಸೆಸ್ಸೆಲ್ಸಿಯಲ್ಲಿ ರಾಜ್ಯಮಟ್ಟದಲ್ಲಿ ರ್ಯಾಂಕ್ ವಿಜೇತ ತಾಲೂಕಿನ ವಿದ್ಯಾರ್ಥಿಗಳಿಗೆ ಅಭಿನಂದಿಸುವ ಕಾರ್ಯಕ್ರಮ ಸಾರ್ವಜನಿಕರ ಪ್ರಶಂಸೆಗೆ ಪಾತ್ರವಾಯಿತು. ಜಿಲ್ಲೆಯಲ್ಲಿ ಬಹುತೇಕ ರಾಜ್ಯಮಟ್ಟದ ರ್ಯಾಂಕುಗಳು ಕುಮಟಾ ತಾಲೂಕಿಗೇ ಲಭಿಸಿದ ಹಿನ್ನೆಲೆಯಲ್ಲಿ ಕಲೆಗೆ ಸೀಮಿತವಾಗಿದ್ದ ಕಲಾಗಂಗೋತ್ರಿ, ಪ್ರತಿಭಾವಂತ ವಿದ್ಯಾರ್ಥಿಗಳನ್ನು ಸನ್ಮಾನಿಸಿ ಗೌರವಿಸುವ ಕಾರ್ಯಕ್ಕೆ ಮುಂದಾಗಿದ್ದು ವಿಶೇಷವಾಗಿತ್ತು.
ಅಭಿನಂದನಾ ಕಾರ್ಯಕ್ರಮದ ಮುಖ್ಯ ಅತಿಥಿಗಳಾಗಿ ಆಗಮಿಸಿದ ಎಪಿಎಂಸಿ ಅಧ್ಯಕ್ಷ ಧೀರೂ ಶಾನಭಾಗ ಮಾತನಾಡಿ ಪ್ರತಿಭಾನ್ವಿತ ವಿದ್ಯಾರ್ಥಿಗಳು ಕೇವಲ ಅಂಕಗಳಿಸುವುದಕ್ಕಷ್ಟೇ ಪ್ರಾಮುಖ್ಯತೆ ಕೊಡದೇ ವಾಸ್ತವ ಬದುಕಿಗೆ ತೆರೆದುಕೊಳ್ಳಬೇಕಾದ ವಸ್ತುಸ್ಥಿತಿ ಹೊಂದಿರಬೇಕು ಎಂದರು. ಸಾಧಕರು ತಮ್ಮ ಮುಕ್ತ ಅನಿಸಿಕೆಗಳನ್ನು ವ್ಯಕ್ತಪಡಿಸುವಾಗ ತಡವರಿಸುವುದು ತರವಲ್ಲ. ಹೊರಪ್ರಪಂಚದ ಜ್ಞಾನ ಶೂನ್ಯವಾಗಿ ಪುಸ್ತಕೀಯ ಬಾಯಿಪಾಠ ಮಾತ್ರದಿಂದ ಬದುಕನೆದುರಿಸುವುದು ಅಸಾಧ್ಯವೆಂಬ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದರು.
ಇನ್ನೋರ್ವ ಮುಖ್ಯ ಅತಿಥಿ ಮಹಾತ್ಮಾ ಗಾಂಧಿ ಪ್ರೌಢಶಾಲೆಯ ಮುಖ್ಯಾಧ್ಯಾಪಕ ಎನ್.ಆರ್. ಗಜು ಮಾತನಾಡುತ್ತಾ ಅನುವಂಶೀಯತೆ, ಪಾಲಕರ ಪ್ರೋತ್ಸಾಹ, ಗುರು-ಹಿರಿಯರ ಆರ್ಶೀವಾದ, ಶಾಲಾ ಪರಿಸರ, ಶಿಕ್ಷಕರ ಸೂಕ್ತ ಮಾರ್ಗದರ್ಶನ, ವಿದ್ಯಾರ್ಥಿಯ ಕಲಿಕಾ ಛಲ ಹಾಗೂ ಅದೃಷ್ಠ ಇವುಗಳೆಲ್ಲ ಮೇಳೈಸಿದಾಗ ಮಾತ್ರ ಪೂರ್ಣಕ್ಕೆ ಪೂರ್ಣ ಅಂಕಗಳಿಸಲು ಸಾಧ್ಯವೆಂದು ಅಭಿಪ್ರಾಯಪಟ್ಟರು. ಹೊಸ ಮೌಲ್ಯಮಾಪನ ಪದ್ಧತಿ ಶತ ಪ್ರತಿ ಶತ ಅಂಕಗಳಿಸುವ ಕೌಶಲ್ಯವನ್ನು ಎತ್ತಿಹಿಡಿಯಬಲ್ಲದೆಂದರಲ್ಲದೇ ಸನ್ಮಾನಿತರಾದ ಎಲ್ಲರೂ ಕೆಲವೇ ಅಂಕಗಳ ವ್ಯತ್ಯಾಸ ಹೊಂದಿದ್ದರೂ ಇಲಾಖಾ ನಿಯಮಾನುಸಾರ ಒಂದೇ ಗ್ರೇಡಿನಡಿ ತೇರ್ಗಡೆಯಾದ ಸಮಾನ ವಿಜೇತರೆಂದು ಸಾರಿದರು. ಕಲಾಗಂಗೋತ್ರಿ ಬಳಗದವರು ಒಂದೇ ವೇದಿಕೆಯಲ್ಲಿ ಗೌರವಿಸುತ್ತಿರುವುದು ಅರ್ಥಪೂರ್ಣವೆಂದರು.
ಕಲಾವಿದ ಎಸ್.ಟಿ.ಭಟ್ಟ ನುಡಿಗವನ ರಚಿಸಿ ವಾಚಿಸಿದರು. ಅಧ್ಯಕ್ಷತೆಯನ್ನು ವಹಿಸಿದ್ದ ಕಲಾಗಂಗೋತ್ರಿ ಅಧ್ಯಕ್ಷ ಶ್ರೀಧರ ನಾಯ್ಕ ವಕ್ಕನಳ್ಳಿ ಪ್ರತಿಭಾವಂತ ವಿದ್ಯಾರ್ಥಿಗಳು ಎಂದಿಗೂ ಸಮಾಜಕ್ಕೆ ಉನ್ನತ ಆದರ್ಶಗಳನ್ನು ಪ್ರದರ್ಶಿಸುತ್ತಾ ತಂದೆತಾಯಿಗಳಿಗೆ ಉತ್ತಮ ಮಕ್ಕಳಾಗಿ ಬಾಳಬೇಕೆಂದು ಕರೆನೀಡಿದರು. ರಾಜ್ಯಕ್ಕೆ ಪ್ರಥಮ ರ್ಯಾಂಕ್ ಪಡೆದ ಸಿವಿಎಸ್ಕೆ ಪ್ರೌಢಶಾಲೆಯ ಕುಮಾರಿ ನಾಗಾಂಜಲಿ ಪರಮೇಶ್ವರ ನಾಯ್ಕ, ನಾಲ್ಕನೆಯ ರ್ಯಾಂಕ್ ಪಡೆದ ಸಿವಿಎಸ್ಕೆಯ ಕುಮಾರಿ ಸಿ.ವಿ.ನಮೃತಾ, ಆರನೆಯ ರ್ಯಾಂಕ್ ಪಡೆದ ನಿರ್ಮಲಾ ಕಾನ್ವೆಂಟ್ ಪ್ರೌಢಶಾಲೆಯ ಕುಮಾರಿ ಗ್ರೀಷ್ಮಾ ಪಾಂಡುರಂಗ, ಏಳನೆ ರ್ಯಾಂಕ್ ಪಡೆದ ಸಿವಿಎಸ್ಕೆಯ ಕುಮಾರಿ ತೇಜಸ್ವಿನಿ ಕೃಷ್ಣಾನಂದ ಶಾನಭಾಗ, ಎಂಟನೆಯ ರ್ಯಾಂಕ್ ಕುಮಾರಿ ಸುದಿತಿ ಗಣೇಶ ಕಾಮತ್, ಕುಮಾರಿ ವಸುಧಾ ರಾಧಾಕೃಷ್ಣ ಪ್ರಭು, ಕುಮಾರ ಪ್ರಮೋದ ಲಿಂಗರಾಜ ನಾಯ್ಕ ಹಾಗೂ ಕನ್ನಡ ಮಾಧ್ಯಮದ ಏಕೈಕ ವಿದ್ಯಾರ್ಥಿ ಮಹಾತ್ಮಾ ಗಾಂಧಿ ಪ್ರೌಢಶಾಲೆಯ ಪ್ರಣೀತ ರವಿರಾಜ ಕಡ್ಲೆ, ಒಂಭತ್ತನೆಯ ರ್ಯಾಂಕ್ ಪಡೆದ ಸಿವಿಎಸ್ಕೆಯ ಅಪೂರ್ವ ಶಾನಭಾಗ ಇವರುಗಳು ಕ್ರಮವಾಗಿ ತಾಲ್ಲೂಕಿಗೆ ಅನುಕ್ರಮ ಸ್ಥಾನ ಪಡೆದಿದ್ದು ಸನ್ಮಾನ ಸ್ವೀಕರಿಸಿ ತಮ್ಮ ಅನಿಸಿಕೆಗಳನ್ನು ಹಂಚಿಕೊಂಡರು. ಇದೇ ಸಂದರ್ಭಧಲ್ಲಿ ಯಕ್ಷಲೋಕದ ಹಿರಿಯ ಕಲಾವಿದ ನೆಬ್ಬೂರು ನಾರಾಯಣ ಭಾಘವತರಿಗೆ ಶ್ರದ್ಧಾಂಜಲಿ ಸೂಚಿಸಿ ಮೌನ ಪ್ರಾರ್ಥನೆ ಸಲ್ಲಿಸಲಾಯಿತು. ಪ್ರಾರಂಭದಲ್ಲಿ ಕಲಾಗಂಗೋತ್ರಿ ಪ್ರಧಾನ ಕಾರ್ಯದರ್ಶಿ ಆರ್.ಡಿ.ಪೈ ಸ್ವಾಗತಿಸಿದರು. ಉಪಾಧ್ಯಕ್ಷ ಗಣೇಶ ಭಟ್ಟ ವಂದಿಸಿದರು. ಶಿಕ್ಷಕ ಮಂಜುನಾಥ ನಾಯ್ಕ ನಿರೂಪಿಸಿದರು. ವೇದಿಕೆಯ ಮೇಲೆ ಪುರಸಭಾ ಸದಸ್ಯ ಎಂ.ಟಿ.ನಾಯ್ಕ, ಅಶೋಕ ಗೌಡ ಮತ್ತಿತರರು ಉಪಸ್ಥಿತರಿದ್ದರು.
