ಹೊನ್ನಾವರ: ಐ.ಪಿ.ಎಲ್ ಪಂದ್ಯದ ಪ್ರಾರಂಭದೊಂದಿಗೆ ಎಲ್ಲೆಡೆ ನಡೆಯುತ್ತಿರುವ ಬೆಟ್ಟಿಂಗ್ ಶಿರಸಿ, ಭಟ್ಕಳ ಹಾಗೂ ಜಿಲ್ಲೆಯ ಅನೇಕ ಕಡೆಗಳಲ್ಲಿ ಸುದ್ದಿಯಾಗುತ್ತಿದೆ. ಪಂದ್ಯದ ಕಾವು ಹೆಚ್ಚು ಅದಂತೆ ಹಣ ಹೂಡಿಕೆ ಹಾಗೂ ಬೆಟ್ಟಿಂಗ್ ದಂಧೆಗಳೂ ಜಾಲ ಜಾಲವಾಗಿ ಹೊರಬರುತ್ತಿದೆ.ಹೊನ್ನಾವರ ತಾಲೂಕಿನ ಹಳದೀಪುರದ 10 ಜನರನ್ನು ಬೆಟ್ಟಿಂಗ್ ಸಂಬಂಧವಾಗಿ ಬಂಧಿಸಲಾಗಿದ್ದು ಪೊಲೀಸ್ ಕಾರ್ಯಾಚರಣೆಯಲ್ಲಿ ಈ ಆರೋಪಿಗಳನ್ನು ವಶಕ್ಕೆ ಪಡೆಯಲಾಗಿದೆ.
ಮುಂಬೈ ಇಂಡಿಯನ್ಸ್ ಮತ್ತು ಡೆಲ್ಲಿ ಕಾಪಿಟಲ್ಸ್ ಪಂದ್ಯದ ವೇಳೆ ಬೆಟ್ಟಿಂಗ್ ಕಟ್ಟಿಕೊಂಡು ಹಳದೀಪುರದ ಸಂತೆ ಮಾರ್ಕೆಟ್ ಸೇರಿದಂತೆ ಇನ್ನೂ ಕೆಲವು ಸಾರ್ವಜನಿಕ ಸ್ಥಳಗಳಲ್ಲಿ ಗುಂಪು ಕಟ್ಟಿಕೊಂಡು ಐಪಿಎಲ್ ಬೆಟ್ಟಿಂಗ್ ನಡೆಸುತ್ತಿದ್ದ ಆರೋಪದಲ್ಲಿ 10 ಜನರನ್ನು ಬಂಧಿಸಲಾಗಿದೆ. ಬಂಧಿತ ಆರೋಪಗಳಿಂದ 10 ಮೊಬೈಲ್ ಪೋನ್ , ಸುಮಾರು 21030 ರೂಪಾಯಿ ವಶಪಡಿಸಿಕೊಳ್ಳಲಾಗಿದೆ ಎಂದು ವರದಿಯಾಗಿದೆ.
ಈ ಬೆಟ್ಟಿಂಗ್ ವಿಷಯಕ್ಕೆ ಸಂಬಂಧಿಸಿದಂತೆ ಹೊನ್ನಾವರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು ಪೊಲೀಸರು ತನಿಖೆ ಕೈಗೊಂಡಿದ್ದಾರೆ. ಪೂರ್ಣ ತನಿಖೆಯ ನಂತರ ಈ ಬಗ್ಗೆ ಇನ್ನಷ್ಟು ಮಾಹಿತಿ ಹೊರಬರುವ ನಿರೀಕ್ಷೆ ಇದೆ.
