ಕುಮಟಾ : ತಾಲೂಕಿನ ಹವ್ಯಕ ಸಭಾಭವನದಲ್ಲಿ ಸೌರಭ ಹಾಗೂ ಯಕ್ಷಗಾನ ಸಂಶೋಧನಾ ಕೇಂದ್ರ ಕುಮಟಾ ಇವರುಗಳ ಸಂಯುಕ್ತಾಶ್ರಯದಲ್ಲಿ ಗುರುದಕ್ಷಿಣೆ ಪಾಂಚಜನ್ಯ ಯಕ್ಷಗಾನವನ್ನು ಅಭಿನೇತ್ರಿ ಯಕ್ಷ ಕಲಾ ಟ್ರಸ್ಟ್ ರವರಿಂದ ಹಮ್ಮಿಕೊಳ್ಳಲಾಗಿತ್ತು.
ಯಕ್ಷಗಾನ ಪ್ರಾರಂಭದಲ್ಲಿ ಚಿಕ್ಕ ಸಭಾ ಕಾರ್ಯಕ್ರಮ ಏರ್ಪಾಡಾಗಿತ್ತು. ಸೌರಭ ಅಧ್ಯಕ್ಷರಾದ ಎಂ ಕೆ ಹೆಗಡೆಯವರು ಸಂಶೋಧನಾ ಕೇಂದ್ರದ ಕಾರ್ಯದರ್ಶಿಗಳಾದ ಶ್ರೀ ವಸಂತ ಬಟ್ ತುಂಬಲೆ ಮಠ ಹಾಗೂ ಮುಖ್ಯ ಅತಿಥಿಗಳಾಗಿ ನಿವೃತ್ತ ಡಿಎಫ್ ಓ ಆರ್ಟಿ ಹೆಗಡೆಯವರು ಆಗಮಿಸಿದ್ದರು. ಸ್ವಾಗತ ಶ್ರೀ ಎಸ್ ವಿ ಹೆಗಡೆ ನಂದಯ್ಯನ್ ನಿರ್ವಹಿಸಿದ್ದರೆ ಪ್ರಾಸ್ತಾವಿಕವಾಗಿ ಶ್ರೀ ಶ್ರೀಕಾಂತ್ ಭಟ್ ಮಾತನಾಡಿದರು. ಸಭಾ ಕಾರ್ಯಕ್ರಮದ ಮೊದಲು ಯಕ್ಷಗಾನ ಮತ್ತು ತಾಳಮದ್ದಲೆ ದಿಗ್ಗಜ ಶ್ರೀ ವಾಸುದೇವ ಸಾಮಗ ಮಲ್ಪೆ ಹಾಗೂ ಮೊನ್ನೆ ಮೊನ್ನೆ ಕಾಲದಲ್ಲಿ ಲೀನವಾದ ಶ್ರೀಪಾದ ಹೆಗಡೆ ಹಡಿನಬಾಳ ಅವರಿಗೆ ಭಾವಶ್ರದ್ಧಾಂಜಲಿ ಅರ್ಪಿಸಲಾಯಿತು. ಯಕ್ಷಗಾನ ಸಂಶೋಧನಾ ಕೇಂದ್ರದ ದಶಮಾನಉತ್ಸವದ ಅಂಗವಾಗಿ “ದಶ ಮಂಗಲೇ ಯಕ್ಷೋತ್ಸವ”ಕ್ಕೆ ಶ್ರೀ ಎಂ ಕೆ ಹೆಗಡೆಯವರು ಜ್ಯೋತಿ ಬೆಳಗಿಸಿ ಚಾಲನೆ ನೀಡಿ ಬರುವ ವರ್ಷ ಸೌರಭದ ರಜತಮಹೋತ್ಸವದ ವರ್ಷವಾಗಿದ್ದು ಸೌರಭವು ಹಲವು ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಿದ್ದು ಸರ್ವರ ಸಹಕಾರವನ್ನು ಕೋರಿದರು.
ಶ್ರೀ ವಸಂತ ಭಟ್ರವರು ನಾಡಿನಾದ್ಯಂತ ದಶಮಾನೋತ್ಸವ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿದ್ದು ತಮ್ಮ ಪ್ರೋತ್ಸಾಹ ನಿರಂತರವಾಗಿ ಬೇಕು ಎಂದರು.ಮುಖ್ಯ ಅತಿಥಿಗಳಾದ ಶ್ರೀ ಆರ್ಟಿ ಹೆಗಡೆಯವರು ಸಾಂದರ್ಭಿಕವಾಗಿ ಕಾರ್ಯಕ್ರಮದ ಕುರಿತು ಶುಭ ಸಂದೇಶ ನೀಡಿದರು. ಶ್ರೀ ವಿನಾಯಕ ಹೆಗಡೆ ಕಟ್ಟೆಯವರು ಅತಿಥಿಗಳಿಗೆ ಸ್ಮರಣಿಕೆ ನೀಡಿದರು.ಶ್ರೀ ಅರುಣ್ ಹೆಗಡೆಯವರು ಭಾವ ಶ್ರದ್ಧಾಂಜಲಿ ನಿರ್ವಹಣೆ ಹಾಗೂ ಕಾರ್ಯಕ್ರಮದ ನಿರೂಪಣೆ ಮಾಡಿದರು. ನಂತರ ನಡೆದ ಗುರುದಕ್ಷಿಣೆ ಯಕ್ಷಗಾನ ಕಾರ್ಯಕ್ರಮ ಉತ್ತಮವಾಗಿ ಮೂಡಿಬಂದು ಯಕ್ಷಪ್ರೇಮಿಗಳ ಶ್ಲಾಘನೆಗೆ ಒಳಗಾಯಿತು.
