ಶಿರಸಿ: ಪ್ರಕೃತಿ ಅಧ್ಯಯನ ಸಂಶೋಧನಾ ಪ್ರಬಂಧಕ್ಕೆ ನಿವೇದಿತಾ ಭಟ್ ರಿಗೆ ವಿದ್ಯಾ ವಾರಿಧಿ ಪಿಎಚ್ ಪದವಿ ಲಭಿಸಿದೆ. ಭಾರತೀಯ ಜ್ಯೋತಿಷ್ಯ ಶಾಸ್ತ್ರದಲ್ಲಿ ಸಿದ್ಧಾಂತ, ಸಂಹಿತಾ ಹೋರಾ, ಎನ್ನುವ ಪ್ರಧಾನ ವಿಭಾಗಗಳಿವೆ. ಅನೇಕ ಜ್ಯೋತಿಷಿಗಳಿಗೆ ಪರಿಚಯವಿಲ್ಲದ ಸಂಹಿತಾ ವಿಷಯದಲ್ಲಿ, ನಕ್ಷತ್ರಗಳ ಆಧಾರದಿಂದ ಪ್ರಾಕೃತಿಕ ಘಟನೆಗಳ ಅಧ್ಯಯನ ಎನ್ನುವ ಪ್ರೌಢ ಪ್ರಬಂಧಕ್ಕೆ ರಾಜಭವನದಲ್ಲಿ ನಡೆದ ಕರ್ನಾಟಕ ಸಂಸ್ಕೃತ ವಿಶ್ವ ವಿದ್ಯಾಲಯದ 10ನೇ ಘಟಿಕೋತ್ಸವದಲ್ಲಿ ರಾಜ್ಯಪಾಲರು ನಿವೇದಿತಾ ಭಟ್‌ರಿಗೆ ಪದವಿ ನೀಡಿದರು.
ಉಡುಪಿಯ ಪ್ರೊ. ಶಿವಪ್ರಸಾದ್ ತಂತ್ರಿ ಅವರ ಮಾರ್ಗದರ್ಶನದಲ್ಲಿ ಅಧ್ಯಯನವಾದ ಈ ಗ್ರಂಥವು ಈಗಾಗಲೇ ಅನೇಕ ವಿದ್ವಾಂಸರಿಂದ, ಪರಿಸರ ಹವಾಮಾನ ತಜ್ಞರಿಂದ ಪ್ರಶಂಸಿಲ್ಪಟ್ಟಿದೆ. ಭಾರತೀಯ ಋಷಿ ವಿಜ್ಞಾನಕ್ಕೂ ಮತ್ತು ಆಧುನಿಕ ಹವಾಮಾನ ಪ್ರಾಕೃತಿಕ ವಿಜ್ಞಾನಕ್ಕೂ ಈ ಗ್ರಂಥವು ಒಂದು ಕೊಂಡಿಯಾಗಿದೆ. ನಿವೇದಿತಾ ಭಟ್ ಅವರು ಗುರುಕುಲ ಪದ್ಧತಿಯಲ್ಲಿ ಮೈತ್ರಿಯಿ ಗುರುಕುಲದಲ್ಲಿ ಓದಿ ಅನಂತರ ತಿರುಪತಿಯ ವಿಶ್ವವಿದ್ಯಾಲಯದಿಂದ ಜ್ಯೋತಿಷ ಶಾಸ್ತ್ರದಲ್ಲಿ ಬಿಎ ಪದವಿಯನ್ನು, ಮೈಸೂರ್ ವಿಶ್ವ ವಿದ್ಯಾಲಯದದಿಂದ ಇಂಗ್ಲಿಷ್‌ನಲ್ಲಿ ಎಂಎ ಪದವಿಯನ್ನು ಪಡೆದ, ಉತ್ತಮ ಉಪನ್ಯಾಸಕರು. ಉಮ್ಮಚಗಿಯ ಶ್ರೀ ಮಾತಾ ಸಂಸ್ಕೃತ ಕಾಲೇಜಿನಲ್ಲಿ 2 ವರ್ಷಗಳ ಕಾಲ ಶಾಸ್ತ್ರ ಪಾಠವನ್ನು ಮಾಡಿ ಈಗ ತಮ್ಮ ಮನೆಯಲ್ಲಿಯೇ ಗುರುಕುಲ ನಡೆಸುತಿದ್ದಾರೆ.
