ಕಾರವಾರ : ಇಳಿ ವಯಸ್ಸಿನ ಇಳಿವಯಸ್ಸಿನ ವ್ಯಕ್ತಿಯೊಬ್ಬ ಹದಿನಾರರ ಯುವತಿಯನ್ನು ಮದುವೆಯಾಗಲು ಹೊರಟಿದ್ದ, ಇದೀಗ ಪೊಲೀಸರ ಬಲಗೆ ಬಿದ್ದಿದ್ದು ಬಂಧಿಸಲಾಗಿದೆ.
ನಗರದ 52 ವರ್ಷದ ಸೆಕ್ಯೂರಿಟಿ ಗಾರ್ಡ್ ಒಬ್ಬ 16 ವರ್ಷದ ಅಪ್ರಾಪ್ತ ಹುಡುಗಿಯನ್ನು ವರಿಸಲು ಹೊರಟಿದ್ದ. ಈ ಮದುವೆ ಕುರಿತು ಅಂಗನವಾಡಿ ಕಾರ್ಯಕರ್ತೆಯರು ಅಧಿಕಾರಿಗಳಿಗೆ ಮಾಹಿತಿ ನೀಡಿದ್ದು, ಇದೀಗ ಮದುವೆಯಾಗಲು ಹೊರಟ ಸೆಕ್ಯೂರಿಟಿ ಗಾರ್ಡ್ ನನ್ನು ಬಂಧಿಸಲಾಗಿದೆ ಎಂದು ವರದಿಯಾಗಿದೆ.
ವ್ಯಕ್ತಿ ಬಂಧನಕ್ಕೊಳಗಾಗುವ ಭಯದಲ್ಲಿ ವಿಷ ಸೇವಿಸಿ ಆತ್ಮಹತ್ಯೆಗೆ ಪ್ರಯತ್ನಿಸಿದ್ದಾನೆ ಎನ್ನಲಾಗಿದ್ದು, ಆತನಿಗೆ ಈ ಕುರಿತು ಕಾನೂನಿನ ಅರಿವಿಲ್ಲ ಎನ್ನಲಾಗಿದೆ.
ಆತನನ್ನು ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಬಳಿಕ ಜಿಲ್ಲಾ ಕಾರಾಗೃಹಕ್ಕೆ ಸೇರಿಸಲಾಗಿದೆ. ವಧು-ವರರು ಇಬ್ಬರೂ ಕಾರವಾರ ನಗರದವರೇ ಆಗಿದ್ದಾರೆ. ಮಾಲಾದೇವಿ ಮೈದಾನದ ವಿಠೋಬ ದೇವಸ್ಥಾನದಲ್ಲಿ ಮದುವೆ ಅಪಾರ ಸಾರ್ವಜನಿಕರ, ಬಂಧು ಬಳಗದವರ ನಡುವೆಯೇ ನಡೆದಿತ್ತು ಎನ್ನಲಾಗಿದೆ.
ಬಂಧು ಬಳಗದವರು ವಧುವನ್ನು ನೋಡಿದರೆ ಸುಮಾರು 25 ರ ವಯೋಮಾನದವರಂತೆ ಕಾಣುತ್ತಾರೆ ಎಂಬ ಅಭಿಪ್ರಾಯ ತೋಡಿಕೊಂಡಿದ್ದಾರೆ. ಪೊಲೀಸ್ ತನಿಖೆ ಮುಂದುವರೆಸಿದ್ದಾರೆ.
