ಮುಂಬೈ: ಖ್ಯಾತ ಕಲಾ ನಿರ್ದೇಶಕ ನಿತಿನ್ ದೇಸಾಯಿ ಅವರು ಮಹಾರಾಷ್ಟ್ರದ ರಾಯಗಢ ಜಿಲ್ಲೆಯ ಕರ್ಜಾತ್‌ನಲ್ಲಿರುವ ಅವರ ಎನ್‌ಡಿ ಸ್ಟುಡಿಯೋದಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆ. ಅಧಿಕಾರಿಗಳ ಪ್ರಕಾರ ದೇಸಾಯಿ ಅವರು 58 ನೇ ವಯಸ್ಸಿನಲ್ಲಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಪೊಲೀಸ್ ಮೂಲಗಳ ಪ್ರಕಾರ, ದೇಸಾಯಿ ಅವರು ಕರ್ಜತ್‌ನಲ್ಲಿರುವ ತಮ್ಮ ಸ್ಟುಡಿಯೋದಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ. ಸುದ್ದಿ ತಿಳಿದ ತಕ್ಷಣ ಪೊಲೀಸರು ಸ್ಥಳಕ್ಕೆ ಧಾವಿಸಿದರು. ದೇಸಾಯಿ ಸಾವಿನ ಕುರಿತು ಎಲ್ಲಾ ಕೋನಗಳಿಂದ ತನಿಖೆ ನಡೆಸಲಾಗುತ್ತಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ನಿತಿನ್ ದೇಸಾಯಿ ಅತ್ಯುತ್ತಮ ಕಲಾ ನಿರ್ದೇಶನಕ್ಕಾಗಿ ನಾಲ್ಕು ಬಾರಿ ರಾಷ್ಟ್ರ ಪ್ರಶಸ್ತಿ ಪಡೆದಿದ್ದರು. ಜನವರಿ 25, 1965 ರಂದು ಮಹಾರಾಷ್ಟ್ರದ ದಾಪೋಲಿಯಲ್ಲಿ ಜನಿಸಿದ ದೇಸಾಯಿ ದೂರದರ್ಶನ ಚಲನಚಿತ್ರ ತಮಸ್ (1987) ನಲ್ಲಿ ಸಹಾಯಕ ಕಲಾ ನಿರ್ದೇಶಕರಾಗಿ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದರು. ನಂತರ ಅವರು ಕಬೀರ್ (1988-1990) ದೂರದರ್ಶನ ಸರಣಿಗಳಲ್ಲಿ ಸಹಾಯಕ ಕಲಾ ನಿರ್ದೇಶಕರಾಗಿ ಕೆಲಸ ಮಾಡಿದರು, 1991 ರಲ್ಲಿ ಚಾಣಕ್ಯ ದೂರದರ್ಶನ ಸರಣಿಯಲ್ಲಿ ಸ್ವತಂತ್ರ ಕಲಾ ನಿರ್ದೇಶನವನ್ನು ಪ್ರಾರಂಭಿಸಿದರು. ಭಾರತ್ ಏಕ್ ಖೋಜ್ (1992-1993), ಕೋರಾ ಕಾಗಜ್ (1993), ಮತ್ತು ಸ್ವಾಭಿಮಾನ್ (1995-1996) ಸೇರಿದಂತೆ ದೂರದರ್ಶನ ಸರಣಿಗಳಲ್ಲಿ ದೇಸಾಯಿ ಕೆಲಸ ಮುಂದುವರೆಸಿದರು. ಅವರು ಹಮ್ ದಿಲ್ ದೇ ಚುಕೆ ಸನಮ್ (1999) ಚಿತ್ರದ ಮೂಲಕ ಕಲಾ ನಿರ್ದೇಶಕರಾಗಿ ಬಾಲಿವುಡ್‌ಗೆ ಪಾದಾರ್ಪಣೆ ಮಾಡಿದರು. ಅವರ ಇತರ ಯಶಸ್ವಿ ಬಾಲಿವುಡ್ ಚಲನಚಿತ್ರಗಳೆಂದರೆ ಲಗಾನ್ (2001), ದೇವದಾಸ್ (2002), ಸ್ವದೇಸ್ (2004), ಜೋಧಾ ಅಕ್ಬರ್ (2008), ಮತ್ತು ಪ್ರೇಮ್ ರತನ್ ಧನ್ ಪಾಯೋ (2015).
ಅವರು ಅತ್ಯುತ್ತಮ ಕಲಾ ನಿರ್ದೇಶನಕ್ಕಾಗಿ ನಾಲ್ಕು ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಗಳನ್ನು ಮತ್ತು ಮೂರು ಫಿಲ್ಮ್‌ಫೇರ್ ಅತ್ಯುತ್ತಮ ಕಲಾ ನಿರ್ದೇಶನ ಪ್ರಶಸ್ತಿಗಳನ್ನು ಪಡೆದರು. 2016 ರಲ್ಲಿ, ಅವರು ಭಾರತದಲ್ಲಿ ನಾಲ್ಕನೇ ಅತ್ಯುನ್ನತ ನಾಗರಿಕ ಪ್ರಶಸ್ತಿಯಾದ ಪದ್ಮಶ್ರೀ ಪ್ರಶಸ್ತಿಯನ್ನು ಪಡೆದರು. ಅವರು ಅಶುತೋಷ್ ಗೋವಾರಿಕರ್, ವಿಧು ವಿನೋದ್ ಚೋಪ್ರಾ ಮತ್ತು ಸಂಜಯ್ ಲೀಲಾ ಬನ್ಸಾಲಿ ಸೇರಿದಂತೆ ಬಾಲಿವುಡ್‌ನಲ್ಲಿ ತಮ್ಮ ಎರಡು ದಶಕಗಳ ಸುದೀರ್ಘ ವೃತ್ತಿಜೀವನದಲ್ಲಿ ಪ್ರಸಿದ್ಧ ನಿರ್ದೇಶಕರೊಂದಿಗೆ ಕೆಲಸ ಮಾಡಿದ್ದಾರೆ. ಹಮ್ ದಿಲ್ ದೇ ಚುಕೆ ಸನಮ್, ದೇವದಾಸ್, ಜೋಧಾ ಅಕ್ಬರ್, ಲಗಾನ್, ಒನ್ಸ್ ಅಪಾನ್ ಎ ಟೈಮ್ ಇನ್ ಮುಂಬೈ ಮತ್ತು ಬಾಜಿರಾವ್ ಮಸ್ತಾನಿ ಮೊದಲಾದ ಖ್ಯಾತ ಸಿನೆಮಾಗಳಿಗೆ ಕಲಾ ನಿರ್ದೇಶಕರಾಗಿದ್ದರು. 2019 ರ ಪಾಣಿಪತ್ ಚಲನಚಿತ್ರದಲ್ಲಿ ಅಶುತೋಷ್ ಗೋವಾರಿಕರ್ ಅವರೊಂದಿಗೆ ಕಲಾ ನಿರ್ದೇಶಕರಾಗಿ ಕೆಲಸ ಮಾಡಿದ್ದು ಅವರ ಕೊನೆಯ ಸಿನೆಮಾವಾಗಿದೆ. ಅವರ ಕೆಲಸಕ್ಕಾಗಿ, ಹಾಲಿವುಡ್‌ನ ಪ್ರತಿಷ್ಠಿತ ಕಲಾ ನಿರ್ದೇಶಕರ ಗಿಲ್ಡ್ ಫಿಲ್ಮ್ ಸೊಸೈಟಿ ಮತ್ತು ಅಮೇರಿಕನ್ ಸಿನಿಮಾಥೆಕ್ ಅವರನ್ನು ಗೌರವಿಸಿದೆ.
ಕಲಾ ನಿರ್ದೇಶನದ ಜೊತೆಗೆ, ನಿತಿನ್ 2003 ರಲ್ಲಿ ದೇಶ್ ದೇವಿ ಮಾ ಆಶಾಪುರ ಚಿತ್ರದ ಮೂಲಕ ನಿರ್ಮಾಪಕರಾದರು. ಅವರು ಅಪಾರ ಜನಪ್ರಿಯ ಮರಾಠಿ ಧಾರಾವಾಹಿ ರಾಜಾ ಶಿವಛತ್ರಪತಿಯನ್ನು ಸಹ ನಿರ್ಮಿಸಿದ್ದಾರೆ. 2005 ರಲ್ಲಿ, ನಿತಿನ್ ಮುಂಬೈನ ಹೊರವಲಯದಲ್ಲಿರುವ ಕರ್ಜತ್‌ನಲ್ಲಿ ಎನ್.ಡಿ. ಸ್ಟುಡಿಯೋಸ್ ತೆರೆದಿದ್ದರು. 52 ಎಕರೆಯಲ್ಲಿ ಹರಡಿರುವ ಸ್ಟುಡಿಯೋ ಹಲವಾರು ಫಿಲ್ಮ್ ಸೆಟ್‌ಗಳಿಗೆ ತಾಣವಾಗಿದೆ.
