ಅಪಘಾತವಾದ ಕಾರಿನಲ್ಲಿತ್ತು ಲಕ್ಷಾಂತರ ರೂಪಾಯಿಯ ಗೋವಾ ಸಾರಾಯಿ.

ಅಂಕೋಲಾ: ಸುಂಕಸಾಳದ ಕೋಟೆಪಾಲ ಕ್ರಾಸ್ ಹತ್ತಿರ ರಸ್ತೆಯಲ್ಲಿ ಅಪಘಾತಗೊಂಡ ಕಾರೊಂದರಲ್ಲಿ ಲಕ್ಷಾಂತರ ರೂಪಾಯಿಯ ಅಕ್ರಮ ಗೋವಾ ಸರಾಯಿ ಪತ್ತೆಯಾದ ಘಟನೆ ನಡೆದಿದೆ. ಕಾರಿನಲ್ಲಿ ಸುಮಾರು 1.33 ಲಕ್ಷ ರೂ. ಮೌಲ್ಯದ ಅಕ್ರಮ ಗೋವಾ ಸರಾಯಿ ಪತ್ತೆಯಾಗಿದ್ದು, ಕಾರು ಚಾಲಕ ಹಾಗೂ ಮಾಲಕ ನಾಪತ್ತೆಯಾಗಿದ್ದಾರೆ.

ಗೋವಾ ಸರಾಯಿಯನ್ನು ತುಂಬಿಕೊಂಡು, ಮಾರಾಟ ಮಾಡುವ ಉದ್ದೇಶದಿಂದ ಯಲ್ಲಾಪುರ ಕಡೆಗೆ ಸಾಗಿಸುತ್ತಿದ್ದಾಗ ಚಾಲಕನ ಅತೀ ವೇಗದ ಚಾಲನೆಯಿಂದಾಗಿ ರಸ್ತೆಯ ಬದಿಯ ಚರಂಡಿಗೆ ಕಾರು ಉರುಳಿ ಬಿದ್ದಿದೆ. ಅಪಘಾತಗೊಂಡ ಕಾರ್ ಜಖಂಗೊಂಡಿದ್ದರಿಂದ ಕಾರು ಪುನಃ ರಸ್ತೆಗೆ ಬರಲಾಗಿರಲಿಲ್ಲ. ಎಲ್ಲಿ ತಮ್ಮ ಅಕ್ರಮ ಚಟುವಟಿಕೆ ಬಯಲಾಗುತ್ತದೆಯೋ ಎಂಬ ಭಯಕ್ಕೆ ಹೆದರಿ ಚಾಲಕ ಕಾರನ್ನು ಅಲ್ಲಿಯೆ ಬಿಟ್ಟು ಪರಾರಿಯಾಗಿದ್ದಾನೆ.

ಅಂಕೋಲಾ ಪೊಲೀಸರಿಗೆ ಸುಂಕಸಾಳದ ಹತ್ತಿರ ಕಾರು ಅಪಘಾತಗೊಂಡಿದೆ ಎಂಬ ಮಾಹಿತಿ ಬಂದಿದ್ದರಿಂದ ಪಿಎಸೈ ಜಯಶ್ರೀ ಪ್ರಭಾಕರ ತಮ್ಮ ಸಿಬ್ಬಂದಿಗಳ ಜೊತೆ ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸಿದಾಗ ಕಾರಿನಲ್ಲಿ ಲಕ್ಷಾಂತರ ರೂಪಾಯಿ ಮೌಲ್ಯದ ಅಕ್ರಮ ಗೋವಾ ಸರಾಯಿ ಇರುವುದು ಕಂಡುಬಂದಿದೆ. ವಾಹನದ ಮಾಲಕನ ಪತ್ತೆಗೆ ಪೊಲೀಸರು ಮುಂದಾಗಿದ್ದು, ಪಿಎಸೈ ಸುನೀಲ ಹುಲ್ಲೊಳ್ಳಿ ಈ ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕ್ರಮ ಕೈಗೊಂಡಿದ್ದಾರೆ.