ಗೋಕರ್ಣ : ಇಲ್ಲಿನ ಕರಿಯಪ್ಟ ಕಟ್ಟೆ ಬೀಚ್ ಹತ್ತಿರ ಈಜಲು ಹೋಗಿ ಮುಳುಗುತ್ತಿದ್ದ ಪ್ರವಾಸಿಗರನ್ನು ರಕ್ಷಿಸಿದ ಘಟನೆ ಇಂದು ಬೆಳಿಗ್ಗೆ 9.30ರ ಸುಮಾರಿಗೆ ನಡೆದಿದೆ. ದಾವಣಗೆರೆ ಮೂಲದವರು ಸಮುದ್ರದಲ್ಲಿ ಆಟವಾಡಲು ಇಳಿದಿದ್ದರು. ಅಲೆಗಳ ಹೊಡೆತಕ್ಕೆ ಸಿಲುಕಿ ದಡಕ್ಕೆ ಬರಲಾಗದೆ ಮುಳುಗುವ ಸ್ಥಿತಿಯಲ್ಲಿದ್ದರು. ಈ ವೇಳೆ ಸಹಾಯಕ್ಕಾಗಿ ಕೂಗಿಕೊಂಡಿದ್ದಾರೆ. ಅಲ್ಲೇ ಸಮೀಪ ಇದ್ದ ಲೈಫ್‌ಗಾರ್ಡ್ ಕೂಡಲೇ ಸಮುದ್ರಕ್ಕೆ ಜಿಗಿದು ಪ್ರವಾಸಿಗರನ್ನು ರಕ್ಷಣೆ ಮಾಡಿದ್ದಾರೆ. ಕರ್ತವ್ಯ ನಿರತ ಲೈಫ್‌ಗಾರ್ಡ್ಗಳಾದ ಸಂದೇಶ್‌ ಹರಿಕಂತ್ರ, ಲೋಹಿತ್ ಹರಿಕಾಂತ್, ವಿಕ್ರಮ್ ಹರಿಕಂತ್ರ, ಸಚಿನ್ ಹರಿಕಂತ್ರ ರಕ್ಷಣೆ ಮಾಡಿದವರು.
