ಚೀನಾದಲ್ಲಿ ಪತ್ತೆಯಾಯ್ತಂತೆ ಕೊರೋನಾದಂತಹುದೇ ಇನ್ನೊಂದು ಹೊಸ ವೈರಸ್…!

ಕೋವಿಡ್‌-19 (COVID-19) ವೈರಸ್‌ ಭೀಕರ ಸಾಂಕ್ರಾಮಿಕ ರೋಗಕ್ಕೆ ಕಾರಣವಾದಂತೆಯೇ ಪ್ರಾಣಿಯಿಂದ ಮನುಷ್ಯನಿಗೆ ಹರಡುವ ಅಪಾಯವನ್ನು ಹೊಂದಿರುವ ಹೊಸ ಬಾವಲಿ ಕೊರೊನಾ ವೈರಸ್ ಅನ್ನು ಚೀನಾದಲ್ಲಿ ಕಂಡುಹಿಡಿಯಲಾಗಿದೆ.

ಸೌತ್ ಚೀನಾ ಮಾರ್ನಿಂಗ್ ಪೋಸ್ಟ್ (SCMP) ಪ್ರಕಾರ, HKU5-CoV-2 ಎಂದು ಕರೆಯಲಾದ ಹೊಸ ವೈರಸ್ ಅನ್ನು ಪ್ರಸಿದ್ಧ ವಿಜ್ಞಾನಿ ಶಿ ಝೆಂಗ್ಲಿ ನೇತೃತ್ವದ ವೈರಾಲಜಿಸ್ಟ್‌ಗಳ ತಂಡವು ಪತ್ತೆ ಮಾಡಿದೆ. ಇದು ಬಾವಲಿಯಿಂದ ಮನುಷ್ಯನಿಗೆ ಹರಡುವ ಸಂಭಾವ್ಯ ಅಪಾಯವಿದೆ ಎಂಬುದು ಆತಂಕಕ್ಕೆ ಕಾರಣವಾಗಿದೆ.

ಈ ಹೊಸ ವೈರಸ್ SARS CoV-2 ವೈರಸ್‌ ಹೋಲಿಕೆಯನ್ನು ಹೊಂದಿದೆ ಎಂದು ಚೀನಾದ ಸಂಶೋಧಕರು ಕಂಡುಕೊಂಡಿದ್ದಾರೆ. SARS CoV-2 ವೈರಸ್‌ ಕೋವಿಡ್ ಸಾಂಕ್ರಾಮಿಕಕ್ಕೆ ಕಾರಣವಾದ ವೈರಸ್ ಆಗಿದೆ. ಈಗ ಪತ್ತೆಯಾಗಿರುವ HKU5-CoV-2 ಎಂದು ಕರೆಯಲಾದ ಹೊಸ ವೈರಸ್ ಕೂಡ ಕೋವಿಡ್ ಮಾಡಿದ ರೀತಿಯಲ್ಲಿಯೇ ಎಸಿಇ2(ACE2) ಎಂಬ ಮಾನವ ಜೀವಕೋಶಗಳಿಗೆ ನುಸುಳಬಹುದು. ಇದು ಎಸಿಇ 2 ರಿಸೆಪ್ಟರ್ ಪ್ರೋಟೀನ್ ಮೂಲಕ ಜೀವಕೋಶಗಳನ್ನು ಪ್ರವೇಶಿಸುತ್ತದೆ ಎಂದು ಸಂಶೋಧಕರು ಹೇಳಿದ್ದಾರೆ. ಕೋವಿಡ್ -19 ವೈರಸ್ ಬಳಸುವುದು ಅದೇ ಮಾರ್ಗವಾಗಿದೆ.

HKU5-CoV-2 ಎಂದರೇನು?
HKU5-CoV-2 ಎಂಬುದು ಮೆರ್ಬೆಕೊವೈರಸ್ ಉಪಕುಲಕ್ಕೆ ಸೇರಿದ ಕೊರೊನಾ ವೈರಸ್ ಆಗಿದೆ, ಇದು ಮಧ್ಯಪ್ರಾಚ್ಯದ ಉಸಿರಾಟದ ತೊಂದರೆ (MERS) ಗೆ ಕಾರಣವಾಗುವ ವೈರಸ್ ಅನ್ನು ಸಹ ಒಳಗೊಂಡಿದೆ. ಹೊಸ ವೈರಸ್ ಮಾನವನ ಇಸಿಇ2(ACE2) ಎಂಬ ಜೀವಕೋಶಗಳಿಗೆ ಪ್ರವೇಶಿಬಹುದು ಎಂದು ವಿಜ್ಞಾನಿಗಳು ಕಂಡುಕೊಂಡಿದ್ದಾರೆ, ಇದು SARS-CoV-2 ಮತ್ತು NL63 (ಸಾಮಾನ್ಯ ಶೀತ ವೈರಸ್) ಗೆ ಹೋಲುತ್ತದೆ. ಆದರೆ ಪ್ರತಿ ಕೊರೊನಾ ವೈರಸ್‌ ಮಾನವರಿಗೆ ಹರಡುವುದಿಲ್ಲ.

ಜರ್ನಲ್ ಸೆಲ್‌ನಲ್ಲಿ ಪ್ರಕಟವಾದ ಅಧ್ಯಯನವು HKU5-CoV-2 ಪ್ರಯೋಗಾಲಯದ ವ್ಯವಸ್ಥೆಗಳಲ್ಲಿ ಮಾನವ ಜೀವಕೋಶಗಳಿಗೆ ಸೋಂಕು ತಗುಲಿರುವುದು ಕಂಡುಬಂದಿದೆ ಎಂದು ಹೈಲೈಟ್ ಮಾಡುತ್ತದೆ, ಪ್ರಯೋಗಾಲಯದ ಪರೀಕ್ಷೆಯ ಸಮಯದಲ್ಲಿ, ವಿಜ್ಞಾನಿಗಳು ಬಳಸಿದ ಮಿನಿ-ಹ್ಯೂಮನ್ ಆರ್ಗನ್ ಮಾದರಿಗಳಲ್ಲಿ ಮಾನವ ಜೀವಕೋಶಗಳಿಗೆ ಸೋಂಕು ತರಲು HKU5-CoV-2 ಗೆ ಸಾಧ್ಯವಾಗಿದೆ ಎಂದು ತಂಡವು ಕಂಡುಹಿಡಿದಿದೆ. ಕೊರೊನಾ ವೈರಸ್‌ ಸಾಮಾನ್ಯ ಶೀತದಿಂದ ತೀವ್ರವಾದ ಉಸಿರಾಟದ ಸಿಂಡ್ರೋಮ್ (SARS) ಮತ್ತು ಕೋವಿಡ್ -19ವರೆಗಿನ ರೋಗಗಳಿಗೆ ಕಾರಣವಾಗುವ ವೈರಸ್‌ ಇತರ ಪ್ರಣಿಗಳಿಗೆ ಜಿಗಿಯುವ ಸಾಮರ್ಥ್ಯದ ಬಗ್ಗೆ ಆತಂಕ ಉಂಟುಮಾಡುತ್ತದೆ. ಈ ಸಂಶೋಧನೆಯಲ್ಲಿ ಮಾನವರಲ್ಲಿ ಈ ವೈರಸ್‌ ರೋಗವನ್ನು ಉಂಟುಮಾಡುತ್ತದೆಯೇ ಎಂಬುದು ನಿಖರವಾಗಿ ಗೊತ್ತಾಗಿಲ್ಲ.

ಆದಾಗ್ಯೂ, ಮಾನವ ಜೀವಕೋಶಗಳಿಗೆ ಸೋಂಕು ತಗುಲಿಸುವ ಅದರ ಪ್ರಸ್ತುತ ಸಾಮರ್ಥ್ಯ ಕೋವಿಡ್ -19 ವೈರಸ್‌ಗಿಂತ ಗಮನಾರ್ಹವಾಗಿ ಕಡಿಮೆ ಇದೆ ಎಂದು ಸಂಶೋಧಕರು ಹೇಳಿದ್ದಾರೆ. ಮಾನವ ಜೀವಕೋಶಗಳಿಗೆ ಸೋಂಕು ತಗುಲಿಸುವ ಸಾಮರ್ಥ್ಯದ ಹೊರತಾಗಿಯೂ, ಮಾನವ ಜನಸಂಖ್ಯೆಗೆ ಅದರ ತಕ್ಷಣದ ಅಪಾಯ ಬಗ್ಗೆ ವೈರಸ್‌ನ ಸಾಮರ್ಥ್ಯವು ಈ ಹಂತದಲ್ಲಿ ಊಹಾತ್ಮಕವಾಗಿಯೇ ಉಳಿದಿದೆ.
ಈ ಹೊಸ ವೈರಸ್‌ನಿಂದ ಉಂಟಾಗುವ ಮತ್ತೊಂದು ಸಾಂಕ್ರಾಮಿಕದ ಬಗ್ಗೆ ಮಿನ್ನೇಸೋಟ ವಿಶ್ವವಿದ್ಯಾಲಯದ ಸಾಂಕ್ರಾಮಿಕ ರೋಗ ತಜ್ಞ ಡಾ ಮೈಕೆಲ್ ಓಸ್ಟರ್‌ಹೋಮ್ ಅವರು ಪ್ರತಿಕ್ರಿಯಿಸಿದ್ದು, ಸಂಶೋಧನೆಯ ವರದಿಯು ವೈರಸ್‌ ಬಗ್ಗೆ ಅತಿಯಾಗಿ ಉತ್ಪ್ರೇಕ್ಷಿಸಿದಂತಿದೆ ಎಂದು ಹೇಳಿದ್ದಾರೆ. ಕೋವಿಡ್‌-19 ವೈರಸ್‌ ಸಾಂಕ್ರಾಮಿಕ ಬಂದು ಹೋದ ನಂತರ ಈಗ ಜನರಲ್ಲಿ ರೋಗ ಪ್ರತಿಬಂಧಕ ಶಕ್ತಿ ಹೆಚ್ಚಿದೆ. ಹೀಗಾಗಿ ಅದು ಜನರಿಗೆ ಹಾನಿ ಮಾಡುವ ಸಾಧ್ಯತೆ ಇಲ್ಲ ಎಂದು ಹೇಳಿದ್ದಾರೆ.