ಶಿರಸಿ: ಇತ್ತೀಚೆಗೆ ಕಾಡಾನೆಗಳ ದಂಡೊಂದು ತಾಲೂಕಿನ ಹಲವು ಗ್ರಾಮಗಳ ಗದ್ದೆಗಳಿಗೆ ನುಗ್ಗಿ ಅಪಾರ ಪ್ರಮಾಣದ ಬೆಳೆ ಹಾನಿ ಮಾಡಿದೆ. ಇದರಿಂದಾಗಿ ಕಂಗಾಲಾದ ರೈತರು ಬೆಳೆ ಪರಿಹಾರಕ್ಕೆ ಆಗ್ರಹಿಸಿದರು.
ಈ ವೇಳೆ ರೈತರ ಪರವಾಗಿ ಸುದ್ದಿಗಾರರೊಂದಿಗೆ ವೃಕ್ಷಲಕ್ಷ ಅಧ್ಯಕ್ಷ ಅನಂತ ಹೆಗಡೆ ಮಾತನಾಡಿ, ತಾಲೂಕಿನ ಬೆಡಸಗಾಂವ್, ಕುರ್ಲಿ, ತೊಗರಳ್ಳಿ, ಕರಕಲಜಡ್ಡಿ, ಅಟಬೈಲ ಹಳ್ಳಿಗಳಲ್ಲಿ 14 ಆನೆಗಳ ಹಿಂಡು ರೈತರ ತೋಟ ಗದ್ದೆಗಳಿಗೆ ನುಗ್ಗಿ ಅಪಾರ ಬೆಳೆ ಹಾನಿ ಮಾಡಿದೆ. ಈ ವೇಳೆ ರೈತರು ತಮ್ಮ ತೋಟ ಗದ್ದೆಗಳಲ್ಲಿ ಆಗಿರುವ ಬೆಳೆಹಾನಿ ತೋರಿಸಿ ಪರಿಹಾರಕ್ಕಾಗಿ ಒತ್ತಾಯಿಸಿದರು. ಆನೆ ಕಂದಕ ನಿರ್ಮಾಣ ಮಾಡಿ ಈ ಹಳ್ಳಿಗಳ ತೋಟ ಗದ್ದೆ ರಕ್ಷಿಸಲು ಅಗತ್ಯ ಯೋಜನೆ ಜಾರಿ ಮಾಡಲು ಅನಂತ ಹೆಗಡೆ ಅಶೀಸರ ಅವರು ಅರಣ್ಯ ಇಲಾಖೆಗೆ ಸಲಹೆ ನೀಡಿದರು.
ಅಪಾರ ಹಾನಿಗೆ ಒಳಗಾದ ಕರಕಲಜಡ್ಡಿಯ ತುಕಾರಾಂ ನಾಯ್ಕ, ವಿರೂಪಾಕ್ಷ, ಮಹಾಬಲೇಶ್ವರ ಹೆಗಡೆ ಅವರ ಗದ್ದೆ ತೋಟಗಳಲ್ಲಿ ಅಡಿಕೆ, ತೆಂಗು, ಬಾಳೆ, ಭತ್ತದ ಗೊಣಬೆ ನಾಶವಾಗಿದ್ದನ್ನು ಪ್ರತ್ಯಕ್ಷ ವೀಕ್ಷಣೆ ಮಾಡಲಾಯಿತು. ಈ ಸಂದರ್ಭದಲ್ಲಿ ಕಾತೂರು ವಲಯ ಅಧಿಕಾರಿ ಮಹೇಶ ಕೆ. ಮಾತನಾಡಿ, ಬೆಳೆಹಾನಿ ಪರಿಹಾರ ಶೀಘ್ರವೇ ವಿತರಿಸುವ ಭರವಸೆ ನೀಡಿದರು.
ಈ ವೇಳೆ ತೊಗರಳ್ಳಿ ಗ್ರಾಮ ಅರಣ್ಯ ಸಮಿತಿ ಅಧ್ಯಕ್ಷ ವಿ.ಆರ್. ಹೆಗಡೆ, ಡಾ. ಕೇಶವ ಹೆಚ್ ಕೊರ್ಸೆ, ಗಣಪತಿ ಕೆ. ಬಿಸಲಕೊಪ್ಪ, ಮಾರುತಿ, ಆಗೇರ ಮುಂತಾದವರಿದ್ದರು.
